بزّاف د النّاس كاتجيهوم صعيبة يعرفو الضّومين ولّا الشّغف ديالهوم دغيا، كاين اللّي جرّب بزّاف د الحوايج و مازال ما مأكّدش هاداك الشّي هو اللّي غايكمّل فيه. بالنّسبة ليا أنا ماكانش عندي هاد المشكل، لانفورماتيك كانحسّ بيها كاتعجبني من ديما. هادشّي اللي صحاب ليا، ولكن فالحقيقية، كلّشي بدا ب قرار واحد دارتو الواليدة، بدّل ليا المسار ديالي كامل.
كلّشي بدا ملي باعت الواليدة السّنسلة ديال الذّهب ديالها باش تشريلي واحد البيرو Pentium 4 و أنا مازال صغير. ديك السّاعة، Windows XP كان هو آخر ما كاين فالـOSـات، هو فاش كتاشفت هاد العالم ديال الكومپّيوتر، ديك السّاعة ما كانش عندي لانترنيت، كونت كاندوّز السّوايع فـPaint و كانكتاشف هاد العجب.
داز الوقت، بدّلت داك الپّيسي بواحد آخر يمكن فيه شي 1GB فالرّام، آنسطاليت فيه GTA San Andreas، كونت كانقيّل نلعبها. من بعد بدّلت الپّيسي مرّة اخرى، هاد الجّديد كان فيه شي 512MB فالرّام. نفس البلان، آنسطاليت فيه تا هو GTA، ولكن ما بغاتش تخدم… بقى راسي كايضرّني علاش خدمات ف هاداك و هادا لّا؟ تمّا فاش كتاشفت الكونسيپت ديال الرّام ولاش صالحة. المهم، ديپّانيت باللّوعاب ديال الفلاش أونلاين.
اللّعب أونلاين خلّاني نكتاشف عالم خور، كان عندي موديم ديال اتصالات، كنت كانعبّأ 10 دّراهم فيها 24 ساعة. الكونيكسيون كانت تقييييلة، الڤيديوات ف يوتيوب كان خسّهوم عام باش يتلوداو. كنت كانرغب الواليد يعبّأ ليا الموديم، و كانبقى فايق الليل و النهار قدام داك الپّيسي باش ما نزڭل حتى ساعة.
من بعد غانكتاشف باللي إلا خلّيت دوك اللّوعاب د الفلاش يتلوداو لـ100% و ديرت save للپّاج، غانقدر نلعبهوم بلا أنتيرنيت؛ صاااافي لقيتها! ولّيت غير كانـsaveـي فاللّوعاب، و نلعبهوم ملّي كاتّسالا ليا التعبئة.
كنت فينمّا ماكايبغيش الپّيسي يشعل، كانحلّو نعرف مالو، حتى كانصايبو (ولّا نزيد نكمّل عليه)، هادشي بالشّوية بالشّوية، خلّاني نتعرّف حتى على الهاردوير، و على كيفاش خدّام هادشّي.
ف الإعدادي، تلاقيت واحد الدرّي عبدالسميع، تعلّمت منّو بزّاف ديال الحوايج خرين، دخلنا ف واحد العالم ديال الأنيمي، اللّوعاب د الڤيديو، كنّا ماشي غير كانلعبوهوم، كنّا حتى كانديرو ليهوم الـmods، خصوصًا الـGTAـات، كانبدّلو الطوموبيلات، كانديرو بلاصتهوم ديال المغرب، الحوايج ديال الـNPCs، الكتابة ف الحيوط، و زيد و زيد.
عبدالسميع كان عندو ڭاع واحد المنتدى، دار فيه mod ديال GTA: Vice City سمّاها GTA Salé. أنا كنت كانـmodـي PES 6، كانبدّل التّونيات د الفراقي ب ديال السيزون اللّخرة، و كانزيد الفراقي ديال البطولة الوطنية. تمّا بديت كانقلّب على كيفاش نصايب لوعاب حتى أنا من اللوّل، ماشي غير نـmodـي.
غانكتاشف Scratch، واحد الـsoftware مديور باش تعلّم تپروڭرامي، كان ناضي الصراحة ف داك العمر باش نكوّن الـmental model ديال كيفاش تورّي للكومپيوتر شنو يدير، توحل ف شي لعيبة، و تلقى الحل من مورا ما تجرب بزّاف د الحوايج… كانت دايراه MIT هاد Scratch، كانو دايرينو ب ڭاع اللّغات، حتى العربية، مع ديك السّاعة ما كانعرف لا لونڭلي لا والو… الله يجازيهوم بخير و صافي.